Si bo ke skirbi un buki no-fikshon, lo bo mester hasi basta research pa bo tin bon informashon pa yena un buki.
1. Hasi Entrevista.
Buska algun eksperto den bo tópiko. Un eksperto den skirbimentu tambe. Traha bo preguntanan delantá i hasi e eksperto den e tereno kaminda bo ke skirbi. Skucha òf graba i bolbe skucha. Traha samenvatting di loke e bisa. Taip tur kos paso den e taipmentu bo ta bin mira mas pida oro chikí chikí ku promé bo no a para ketu né. Bo por pidi e eksperto si bo por tuma kontakto kuné despues via e-mail si bo tin pregunta adishonal. For di e promé entrevista lo bo saka sufisiente pregunta pa bo por hasi un di dos entrevista òf pa bo saka punto pa e outline di bo buki.
2. Bai Biblioteka
Bo por bai biblioteka públiko, biblioteka di un skol òf universidat òf bo por bai biblioteka ‘online’ si bo tin akseso né. Wak pa e asistente na e biblioteka ta bo mihó amigu! Lag’é yuda bo bai database nan di informashon. Kòrda e entrevista i sigui riba e tópikonan ku bo mester sa mas di dje.
3. Universidat & Biblioteka Spesialisá.
Wak den bibliotekanan di universidatnan. Tin hopi ‘online’ òf bai sinta einan un dia i buska buki ku informashon. ‘Scan’ i manda pa bo mes òf saka potrèt i manda pa bo mes.
4. Determiná algun Nòmber grandi den e área ku bo ta skirbi di dje i Buska nan Buki. Amazon i Kindle por laga bo kumpra esaki fásil.
No tin nada nobo bou di solo. Si abo ke skirbi algu, sigur un otro hende tambe a skirbi algu paresido. Busk’é i siña for di dje pero skirbi bo mes kos. Wak pa bo buki tin UN OTRO ANGULO di esnan ku ta riba merkado kaba. No skirbi Beibel di Luisette Kraal. Promé página: “Den Kuminsamentu …” No, nos tin un Beibel kaba! Les’é i saka informashon afó i usa, ma semper duna kredensial. Ami sa lesa e REVIEW nan di e buki ku mi ta interesá aden paso ya kaba esei so ta duna mi ideanan nobo.
5. Revista
Wak korant i revista riba e tópiko relevante. Dependé bo tópiko bo por pensa riba, The Wall Street Journal, Business Week, Forbes, Fortune i Barron’s. Bo por wak revistanan médiko, inskribí pa risibí e revista di Harvert University ect.
6. Wak Organisashonnan di Gobièrnu ku ta trata bo tópiko.
Tin asina tantu informashon riba merkado ku esei mes por brua bo. Mayoria kos ta pòrnada. Hopi kos bo por pidi. Wak tambe e direktivanan di organisashonnan ‘non-profit’ ect. Check http://www.lib.lsu.edu/gov/tree.
7. Internet
Bai Google Scholar i kuminsá einan. No kuminsá ku Wikipedia pa bo buki. Pero e por ta un bon komienso pa bo djis komprondé kiko ta e tópiko grandi den e loke bo ke skirbi. Tambe bo por wak den e akreditashon te abou di e página pa bo sa kua bukinan ta di ekspertonan den bo área. Siña usa bo ‘search engine’ bon.
Bo tin mas sugerensia pa hasi research? Skirbi nan aki pa mi …